काठमाडौं । नेपाल एसोसिएसन फर सफ्टवेयर एण्ड आईटी सर्भिस कम्पनीज (नास आईटी) ले आउँदो कार्तिक २१ र २२ गते ‘टिग नास आईटी एक्सपो २०२५’ आयोजना गर्ने भएको छ। ललितपुरको सानेपास्थित हेरिटेज गार्डेनमा हुने यो एक्सपो नेपालको आईटी क्षेत्रको विकास र डिजिटल उद्यमशीलताको प्रवर्द्धनमा केन्द्रित रहनेछ।
नास आईटीका अध्यक्ष गौरव पाण्डेका अनुसार, एक्सपोले नेपालको आईटी कम्पनी, नेतृत्व र लगानीकर्तालाई एउटै प्लेटफर्ममा ल्याई सहकार्य र नवीनतम प्रविधिको सम्भावनामा केन्द्रित हुन मद्दत गर्नेछ। उनले आईटी क्षेत्रमा निजी र सार्वजनिक क्षेत्रबीचको सहकार्य बढाउन यस्तो मञ्चले महत्वपूर्ण भूमिका खेल्ने विश्वास व्यक्त गरे।
नास आईटीका उपाध्यक्ष दिपेन चापागाईंले आईटी र व्यवसायिक समुदायबाट आएको उत्साहजनक सहभागिताले एक्सपोप्रति आशा बढाएको बताए। उनका अनुसार, ‘सहकार्य, नवप्रवर्तन र विश्वासको बलमा नेपालको डिजिटल भविष्य निर्माण गर्ने’ लक्ष्यका साथ यो एक्सपो ऐतिहासिक माइलस्टोन बन्नेछ।
नास आईटीकी महासचिव एलिसा श्रेष्ठले एक्सपो केवल प्रदर्शनी नभई नेपालका आईटी प्रतिभा र व्यवसायिक अवसरबीचको सेतु भएको बताइन । एक्सपोमा ३० भन्दा बढी आईटी सेवा र प्रोडक्टहरू प्रदर्शनमा रहने उनको भनाई छ ।
दुई दिनसम्म चल्ने कार्यक्रममा कम्पनीहरूले आफ्ना नवीनतम डिजिटल समाधान सार्वजनिक गर्न र लाइभ पिच सेसन मार्फत आफ्नो सोच प्रस्तुत गर्न सक्नेछन्।
एक्सपोमा उद्यमी, निजी तथा सरकारी क्षेत्रका उच्च अधिकारी, नीति निर्माता, लगानीकर्ता र सूचना प्रविधिमा रुचि राख्ने सहभागीहरू उपस्थित हुने अपेक्षा गरिएको छ।
यस वर्षको एक्सपोका शीर्ष प्रायोजकमा टिग, सिल्भर प्रायोजकमा इसेवा, साथै र्यापिड, रिडक्ट, एनसेल बिजनेस, भायानेट कम्युनिकेसन र डेटा वर्ल्ड रहेका छन्। दिगो विकास साझेदारका रूपमा ग्लोबल आईएमई बैंक र अर्किङ कलेज सहकार्य गर्दै छन्।
नास आईटी नेपालका आईटी कम्पनीहरूको प्रतिनिधित्व गर्ने गैर–नाफामुखी संस्था हो।
