काठमाडौं । डिजिटल भुक्तानी सेवा प्रदायक आइएमई पे र खल्तीबीचको मर्जर भएसँगै अब प्रयोगकर्ताहरूले आफ्नो आइएमई पे खाता खल्तीमा सार्नुपर्ने भएको छ। खल्तीले सूचना जारी गर्दै आगामी कार्तिक मसान्तभित्र माइग्रेसन प्रक्रिया पूरा गर्न सबै प्रयोगकर्तालाई आग्रह गरेको छ।
खल्तीका अनुसार, आइएमई पेबाट भइरहेको सबै कारोबार अब खल्तीमार्फत सञ्चालन हुनेछ। ३० कार्तिकपछि आइएमई पे एप निष्क्रिय हुने भएकाले त्यसपछि आइएमई पेबाट कारोबार गर्न सम्भव रहने छैन।
खल्तीको सूचनामा भनिएको छ, “आइएमई पेमार्फत भइरहेको कारोबार खल्तीमा सार्ने प्रक्रिया सुचारु भइसकेको छ। कृपया आफ्नो आइएमई पे खाता यथाशीघ्र खल्तीमा माइग्रेसन गरी कारोबार गर्न अनुरोध गर्दछौं।”
यसअघि, नेपालका दुई ठूला डिजिटल भुक्तानी सेवा प्रदायक कम्पनी — आइएमई डिजिटल सोलुसन लिमिटेड (आइएमई पे) र खल्ती प्रालि बीच मर्जर (गाभ्ने) सम्झौता भई १ साउनदेखि एकीकृत कारोबार प्रणाली लागू गरिएको थियो।
मर्जरपछि दुबै कम्पनीको सेवा र प्रणाली एकीकृत हुँदै गएको खल्तीले जनाएको छ। अब प्रयोगकर्ताले एउटै प्लेटफर्ममार्फत मोबाइल रिचार्ज, बिल भुक्तानी, बैंक ट्रान्सफरजस्ता सबै सुविधा उपयोग गर्न सक्नेछन्।
संक्षेपमा भन्नुपर्दा मंसिर १ गतेबाट आइएमई पेको एप बन्द हुनेछ, र सबै कारोबार खल्ती एपमार्फत मात्र गर्नुपर्नेछ। त्यसैले प्रयोगकर्तालाई खाता शीघ्र माइग्रेसन गर्न अनुरोध गरिएको छ।
